記頭屆台灣文史營 董峰政

土城釘根人人褒，聖母顯靈爻發落，

台灣本土有倚靠，文史發揚在鯤島。

土城有名放煙火，文化提倡無機會，

三不五時受人詼，平平媽祖差赫濟。

土城頭屆辦文史，執掌大旗是漁夫，

絞盡腦汁毋認輸，能文能武真合軀。

口喙薄舌了戇工，籌備會議無輕鬆，

邀請爻人鬥相共，用心稽考有所望。

台灣文史傳香火，蕃薯仔囝來炊粿，

祖公歷史咱愛背，阿娘的話咱來喘。

台灣文史頭一擺，報紙媒體爻舖排，

轟動海內通世界，報名夠額兼滿台。

四暝五工文史營，暗頓食飽緊起行，

觀賞晚會好心情，笑破腹肚叫阿娘。

土城頭屆文史營，圓滿結束心頭定，

滿載文史寬寬行，明年擱來拚輸贏。

學員吐詩泵泵滾，七字仔詩來釘根，

台灣史詩百外本，漁夫贈送笑呅呅。